నేను చదివిన ఉన్నత పాఠశాల 

1966 నుంచి 1971 వరకు నేను ప్రకాశం జిల్లా ఇంకొల్లు మండలంలోని పావులూరు ఉన్నత పాఠశాల లో చదువుకున్నాను. ప్రతిరోజు మావూరు నాగండ్ల నుంచి 4 కిలోమీటర్లు నడిచి వెళ్ళేవాళ్ళం. ఎండల్లో,  వానల్లో పిల్లలందరం కబుర్లు చెప్పుకుంటూ అలసట లేకుండా స్కూల్ చేరేవాళ్ళం. అలాగే సాయంత్రం  కూడా అందరం ఆడుతూ పాడుతూ తిరిగి ఇళ్లకు చేరేవాళ్ళం. 

10వ తరగతి తరువాత నేను ఇంటర్మీడియట్ చదవడానికి హైదరాబాద్ వచ్చాను . చదువు ఆ తరువాత ఉద్యోగం , తీరికలేని పనులు , ఎప్పుడన్నా వూరు వెళ్లినా స్కూల్ చూడటానికి వెళ్ళలేదు .  50 సంవత్సరాల తరువాత ఫిబ్రవరి  8వ తేదీన పావులూరు స్కూల్ కు వెళ్ళాను . ఆ స్కూల్ ను చూడగానే నాకు  చదువు చెప్పిన ఉపాధ్యాయులు , నాతో పాటు చదివిన పిల్లలు, నేను 10వ తరగతిలో ఉండగా ఎస్ .పి .ఎల్ గా ఉన్నప్పుడు  (విద్యార్థి నాయకుడు ) ప్రతి రోజు ఉదయం ఉపాధ్యాయులు , విద్యార్థులు   ప్రార్ధనలో పాల్గొనేవారు  .ఆ జ్ఞాపకాలు  నా స్మృతి పథంలో మెదిలాయి . 

స్కూల్ అంతా తిరిగి చూశాను . చాలా మార్పులు వచ్చాయి . అయినా మేము చదివిన  ఆ భవనం అలాగే వుంది . పదవ తరగతి గదిలో కాసేపు గడిపాను.   ఆ అనుభూతి ని మాటల్లో చెప్పలేను. 

 

.