Bhageeradha G

  ముఖ్యమంత్రి రేవంత్ రెడ్డి గారికి పుట్టినరోజు శుభాకాంక్షలు  ఈరోజు ముఖ్యమంత్రి అనుముల  రేవంత్  రెడ్డి గారి 57వ పుట్టినరోజు . తెలంగాణ రాష్ట్ర రెండవ ముఖ్యమంత్రిగా అనుముల రేవంత్ రెడ్డి గారు 2023 డిసెంబరు 7వ తేదీన పదవీ ప్రమాణ స్వీకారం చేశారు. ఆనతికాలంలోనే ముఖ్యమంత్రిగా మంచి పేరు సంపాదించారు .  రేవంత్ రెడ్డి గారిని 2022 సంవత్సరం జూన్ లో మొదటిసారి జూబిలీహిల్స్ లోని వారి నివాసంలో మిత్రుడు మిద్దె శ్రీరామ్ రెడ్డి గారితో కలవడం జరిగింది.  నందమూరి తారకరామారావు గారి శత జయంతి సందర్భంగా నేను రచించిన 'మహానటుడు - ప్రజానాయకుడు ,ఎన్.టి.ఆర్' అనే పుస్తకాన్ని అప్పుడు బహుకరించాను .  రెండవసారి గద్దర్ అవార్డుల కమిటీ సభ్యుడుగా రిపోర్ట్ ఇవ్వడానికి 2025 మే 28న వారి నివాసంలో కలవడం జరిగింది . ఆరోజు నందమూరి తారక రామారావు గారి జయంతి. ఆ సందర్భంగా నెందు సంపాదకత్వం వహించిన 'తారకరామం 'అనే పుస్తకాన్ని ముఖ్యమంత్రి రేవంత్ రెడ్డి గారికి బహుకరించాను . వారు చాలా సంతోషించారు . రామారావు గారంటే తనకు చాలా అభిమానమని చెప్పారు . ఈరోజు రేవంత్ రెడ్డి గారి జన్మదినం, వారికి పుట్టినరోజు శుభాకాంక్షలు .

  దీపావళికి ఊహించని బహుమతి  ఈరోజు ఉదయం ఇమెయిల్ చూసి నేను ఆశ్చర్యపోయాను . వెంటనే నమ్మలేకపోయాను . కళ్ళు నులుముకుని మరీ చూశాను . ప్రధాని నరేంద్ర మోడీ గారి నుంచి నాకు దీపావళి గ్రీటింగ్.  నేను అభిమానించే నిస్వార్ధ , నిరుపమాన నాయకుడు ప్రధాని నరేంద్ర మోడీ గారు . ఇలాటి గ్రీటింగ్స్  చాలా మందికి  వచ్చి ఉండవచ్చు . కానీ .. నాకు మాత్రం  ఎంతో ప్రత్యేకంగా అనిపించింది . ఈ దీపావళికి నేను మర్చిపోలేని  బహుమతిని అందించిన ప్రధాని నరేంద్ర మోడీ గారికి మనస్ఫూర్తిగా  కృతజ్ఞతలు . 

  రాజేంద్ర ప్రసాద్ 94వ జయంతి  ఈరోజు నిర్మాత దర్శకుడు వి .బి .రాజేంద్ర ప్రసాద్ గారి 94వ జయంతి . తెలుగు, తమిళ, హిందీ భాషల్లో 29 చిత్రాలను రూపొందించారు. నిర్మాతగా , దర్శకుడుగా , రచయితగా తనదైన ముద్రను సినిమా రంగంపై వేశారు. తన కుమారుడు జగపతి బాబును 1989లో 'సింహ స్వపనం 'సినిమా ద్వారా హీరోగా పరిచయం చేశారు  2003లో రాజేంద్ర ప్రసాద్ గారి సేవలను గుర్తించిన ఆంధ్ర ప్రదేశ్ ప్రభుత్వం వారిని రఘుపతి వెంకయ్య నాయుడు అవార్డుతో సత్కరించింది .  రాజేంద్ర ప్రసాద్ గారు చైర్మన్ గా ఫిలింనగర్ దైవ సన్నిధానము 2004 ప్రారంభమైంది. 2004లోనే నేను రచించిన 'దసరా బుల్లోడు ' పుస్తకం ప్రచురితమైంది.  రాజేంద్ర ప్రసాద్ గారితో నాకు ఆత్మీయమైన అనుబంధం వుంది . 

  ఆర్ .కె .ప్రకృతి వ్యవసాయం  'నాగలాదేవి 'కన్నడ నవల ఆవిష్కరణ హంపిలోని విరూపాక్ష దేవాలయంలో జరిగింది. తరువాత  రోజు దేవన్న, శివ ప్రసాద్ గారితో కలసి  నటుడు, నిర్మాత , దర్శకుడు ఆర్.కె  ( రామకృష్ణ వీరమాచనేని)ను కలవడానికి వారి  ఫుడ్ ఫారెస్ట్ కు వెళ్ళాము . చాలా కలం నుంచి ఆర్ .కె . అక్కడ పొలం కొని ప్రకృతి వ్యవసాయం చేస్తున్నాడు . చాలా ప్రశాంతమైన జీవితం గడుపుతున్నాడు . 'సినిమాలు వున్నప్పుడు హైదరాబాద్ వస్తా , మిగతా సమయమంతా ఇక్కడే , మనసుకుకు ఎంతో ప్రశాతంగా వుంది ' అని చెప్పాడు . ఆర్ .కె . పొలంలో అన్ని రకాల పండ్ల మొక్కలు వేశాడు . కూరగాయలు కూడా పండిస్తున్నాడు . ' నాలుగు కిలో మీటర్ల దూరంలో మరి కొంత పాలం ఉందని అక్కడ వారి పండిస్తున్నానని' చెప్పాడు . ఆర్ .కె .కి నా పుస్తకాలు బహూకరించి శాలువాతో సత్కరించాను .   ఆర్ .కె .నాకు మంచి  మిత్రుడు . వచ్చేటప్పుడు వారి పొలంలో పండిన కూరగాయలు , బొప్పాయి పండు ఇచ్చాడు . ఇప్పుడు చాలా మంది ప్రకృతి వ్యవసాయం పట్ల ఆసక్తి చూపిస్తున్నారు . 

  ఆత్మీయతను పంచిన మిత్రుడు భాస్కర నాయుడు  నాగలాదేవి కన్నడ పుస్తక ప్రచురణకు  ఆర్ధికంగా సహాయం చేసిన మిత్రుడు భీమినేని భాస్కర నాయుడు. అంతకు ముందు దేవన్న గారు భాస్కర నాయుడు గారి గురించి చెప్పారు . భాస్కర నాయుడు గారిది బళ్లారిలో స్థిరపడిన తెలుగు కుటుంబమని, వారికి పరిశ్రమ ఉందని, మనిషి చాలా సౌమ్యుడని దేవన్న నాతో చెప్పారు .   ఈ పుస్తక ఆవిష్కరణ హంపిలోని విరూపాక్ష దేవాలయంలో జరిగినప్పుడు దేవన్న భాస్కర నాయుడును నాకు పరిచయం చేశారు .  భాస్కర నాయుడు ను చూడగానే సదభిప్రాయం కలిగింది. ఆయన కూడా తెలుగు వాడు కావడం మరింత ఆనందదాయకం . ఆరోజు కార్యక్రమంలో పాల్గొన్న భాస్కర నాయుడును మాట్లాడమంటే 'నాకు అలవాటు లేదు సర్ ' అని చెప్పడం ఆయన ఒదిగి వుండే తత్వాన్ని తెలియజేసింది . అదే రోజు మధ్యాహ్నం 250 మందికి చక్కటి బోజనాలను ఏర్పాటు చేసి అందరి ప్రశంశలు అందుకున్నాడు . భాస్కర నాయుడు గారి చిత్రాన్ని మిత్రుడు శివ ప్రసాద్ గారు గీసి నాతో బహుకరించారు .  భాస్కర నాయుడు మంచి స్నేహశీలి .

  శేషేంద్ర శర్మ గారితో మధుర స్మృతి  ఈరోజు గుంటూరు శేషేంద్ర శర్మ గారి శత జయంతి . శర్మ గారు తెలుగు సాహిత్యంలో అరుదైన కవి. తెలుగు , సంస్కృత , ఆంగ్ల భాషల్లో ప్రతిభావంతుడు . శర్మ గారు ముత్యాలముగ్గు సినిమాలో ' నిదురించే తోటలోకి పాట ఒకటి వచ్చింది ' అనే పాత దర్శకుడు బాబు కోరితో వ్రాశారు . ఆ తరువాత శర్మ గారు మారె సినిమాలోనూ వ్రాయలేదు .  నేను జ్యోతి చిత్ర లో  రిపోర్టర్ గా పనిచేటప్పుడు సీనియర్ జర్నలిస్ట్ ఆంజనేయ శాస్త్రి తో కలసి కార్యక్రమాలకు వెడుతూ ఉండేవాడిని .  అలా ఒకరోజు సాహిత్య క్రార్యక్రమంలో శేషేంద్ర శర్మ గారు పరిచయం అయ్యారు . శర్మ గారు మా ఇద్దరినీ నాంపల్లి కి సమీపంలోని గోషామహల్ లోని  జ్ఞాన్ బాగ్ ప్యాలెస్ కు రమ్మని ఆహ్వానించారు.  శర్మ గారు , వారి శ్రీమతి ఇందిరాదేవి , సాయంత్రాలు కవులను వారి నివాసానికి ఆహ్వానించి సాహిత్య చర్చలు , కవితా గానం వినడం  అలవాటు అని నేను విన్నాను . ఆంజనేయ శాస్త్రి గారితో నేను రాసిన కవిత్యం వినిపిస్తాను అని చెప్పగానే , 'ఓఎస్ , తీసుకురా' అన్నాడు . ఆరోజు సాయంత్రం ఇద్దరం జ్ఞాన్ బాగ్ ప్యాలెస్ కు వెళ్ళాము . శర్మ గారు మా ఇద్దరినీ ఆత్మీయం...