"మహానటుడు, ప్రజానాయకుడు - ఎన్ .టి .ఆర్" పుస్తకాన్ని ఆవిష్కరించిన లోకేశ్వరి, పురందేశ్వరి
విశ్వ విఖ్యాత, నట సార్వభౌమ నందమూరి తారక రామారావు శత జయంతి సందర్భగా నేను రచించిన " మహానటుడు, ప్రజానాయకుడు -ఎన్ .టి .ఆర్ " అన్న పుస్తకాన్ని అన్నగారి కుమార్తెలు లోకేశ్వరి ,పురందేశ్వరి ఆవిష్కరించారు . మొదటి ప్రతిని తెలుగు దేశం నాయకురాలు పరిటాల సునీత స్వీకరించారు. ఈ పుస్తకాన్ని ఆంధ్ర జ్యోతి మాజీ మేనేజింగ్ డైరెక్టర్ కానూరి జగదీష్ ప్రసాద్ కు అంకితం ఇచ్చాను . నేను ఆంధ్ర జ్యోతిలో పనిచేటపుడు జగదీష్ గారు మేనేజింగ్ డైరెక్టర్ . ఆ కృతజ్ఞతో రామారావు గారి మీద వ్రాసిన పుస్తకాన్ని అంకితం ఇచ్చాను
హైదరాబాద్ ఫిలిం నగర్ లో శనివారం ఉదయం తెలుగు నిర్మాతల మండలి ఆధ్వర్యంలో జరిగిన ఈ కార్యక్రమంలో ఎన్ .టి .ఆర్ కుటుంబ సభ్యులంతా పాల్గొన్నారు. ఈ సందర్భంగా తారక రామారావు విగ్రహాన్ని తెలంగాణ రాష్ట్ర సమితి శాసన సభ్యుడు మాగంటి గోపినాథ్ ఆవిష్కరించారు . అనంతరం జరిగిన సభలో నేను రచించిన "మహానటుడు, ప్రజానాయకుడు - ఎన్ .టి .ఆర్" గ్రంథావిష్కరణ జరిగింది . ఈ సందర్భంగా ఎన్టీఆర్ శత జయంతి రోజున ఆ మహనీయుని శ్రీకృష్ణ విగ్రహాన్ని ఆవిష్కరించడం తో నా జన్మ ధన్యమైనట్టు భావిస్తున్నానని చెప్పారు . జర్నలిస్టు భగీరథ ఎన్ .టి .ఆర్ మీద పుస్తకం వ్రాయడం ఎంతో సముచితంగా ఉందని గోపి తెలిపారు.
నిర్మాతల మండలి అధ్యక్షుడు కళ్యాణ్ మాట్లాడుతూ . ఎన్ .టి .ఆర్ శత జయంతి రోజు వారి కుమారుడు మోహన కృష్ణ సహకారంతో ఫిలిం నగర్ లో రామారావు గారి విగ్రహాన్ని ఏర్పాటు చెయ్యడం ఎంతో ఆనందంగా ఉందని , ఈ రోడ్ కు ఎన్ .టి .ఆర్ మార్గ్ అని నామకరణం చేయించవలసిందిగా గోపి గారికి విజ్ఞప్తి చేస్తున్నా. ఆలాగే సీనియర్ జర్నలిస్ట్ భగీరథ రామారావు గారి మీద పుస్తకం వెలువరించడం కూడా మాకు సంతోషాన్ని కలిగిస్తుంది అని చెప్పారు .
నిర్మాతలమండలి కార్యదర్శి తుమ్మల ప్రసన్న కుమార్ మాట్లాడుతూ , ఫిలిం నగర్ లో అన్న గారి విగ్రహాన్ని పెట్టాలనే ప్రతిపాదన రాగానే మోహన కృష్ణ గారు ముందుకు వచ్చారని , ఫిలిం నగర్ తరుపున ఆదిశేషగిరావు , సూర్యనారాయణ , శాసన సభ్యుడు మాగంటి గోపి గారు సంపూర్ణ సహాయ సహకారాన్ని అందించారని చెప్పారు . రామారావు గారితో జర్నలిస్టుగా సాన్నిహిత్యం వున్న భగీరథ గారు "మహానటుడు,ప్రజానాయకుడు - ఎన్ .టి .ఆర్ " అన్న పుస్తకం వ్రాయడం కూడా మాకు ఆనందాన్ని కలిగిస్తుందని చెప్పారు .
అద్భుతంగా జరిగిన ఈ సభలో నేను మాట్లాడుతూ - ఎన్ .టి .రామారావు గారితో నాకు రెండు దశాబ్దాల అనుబంధం ఉంది ఆయనతో ఎన్నో ఇంటర్వ్యూ లు చేశాను. వారిని ఎప్పుడు కలిసినా నన్ను ఆత్మీయంగా పలుకరించేవాడు. రామారావు గారి శత జయంతి ప్రారంభం రోజున , నిర్మాతల మండలి సహకారంలో ఈ పుస్తకాన్ని 17 రోజుల్లో పూర్తి చేశాను . ఈ రోజున ఈ పుస్తకాన్ని రామారావు గారి ఇద్దరు కుమార్తెలు లోకేశ్వరి , పురందేశ్వరి ఆవిష్కరించడం, కుటుంబ సభ్యులంతా పాల్గొనడం ఎంతో ఆనడం గా ఉంది అని చెప్పాను
ఈ కార్యక్రమంలో ఎన్టీఆర్ కుమారులు జయకృష్ణ , మోహన కృష్ణ , రామ కృష్ణ , లోకేశ్వరి ,పురందేశ్వరి , మనుమలు , మనవరాళ్ళు ,సినిమా రంగానికి తమ్మారెడ్డి భరద్వాజ, డి .వి .కె . రాజు , కాట్రగడ్డ ప్రసాద్ ,వల్లభనేని అనిల్ ,కాశీ విశ్వనాథ్ , చంద్ర మధు , వై . అనిల్ బాబు ,అట్లూరి నాగేశ్వర రావు , ఉమామహేశ్వర రావు , పర్వతనేని రామ్ బాబు పాల్గొన్నారు
Comments
Post a Comment