రాష్ట్రపతి జ్ఞాని జైల్ సింగ్ ఆశ్చర్యపోయారు 

జ్ఞాని  జైల్ సింగ్ మన దేశానికి ఏడవ రాష్ట్రపతి.

రాష్ట్రపతిగా జైలు సింగ్  జూలై 25, 1982 న పదవీ ప్రమాణ స్వీకారం చేశారు.

జనవరి రెండవ తేదీ 1987లో  జైలు సింగ్ హైదరాబాద్ వచ్చారు . 

వారు బేగంపేట్ ఎయిర్ పోర్ట్ లో విమానం దిగినప్పుడు మా ఆంధ్ర జ్యోతి ఫోటోగ్రాఫర్  ఫోటో తీశాడు .

1986లో  ఆంధ్ర జ్యోతి దిన పత్రిక హైదరాబాద్ ఎడిషన్ ప్రారంభమయ్యింది.

హైదరాబాద్ ఎడిషన్ లో మొదటి , చివరి పేజీ లో కలర్ ఫోటోలు ప్రచురించేవారు . 

అప్పటికి మిగతా దిన పత్రికల్లో కలర్ ప్రవేశపెట్టలేదనుకున్నాను. 

రాష్ట్రపతి జైలు సింగ్ హైదరాబాద్ వచ్చిన ఫోటోను ఆంధ్ర జ్యోతి చివరి పేజీ లో కలర్ లో ప్రచురించారు . 

జనవరి 3వ తేదీన రాష్ట్రపతి జైలు సింగ్ తో రాజ్ భవన్ తేనీటి సమావేశం ఏర్పాటు చేశారు . 

ఈ సమావేశానికి జర్నలిస్టులను ఆహ్వానించారు . ఆంధ్ర జ్యోతి స్టాఫ్ రిపోర్టర్ టి .ఉడయవర్లు నన్ను కూడా రమ్మన్నారు .

రాష్ట్రపతి సమావేశంలో అక్రిడిటేషన్  (accreditation ) కార్డు వున్న వారినే అనుమతిస్తారు. 

నేను జ్యోతి చిత్ర సినిమా వార పత్రికలో పనిచేస్తున్నా , నాకు 1980 నుంచి ఆంధ్ర జ్యోతి రిపోర్టర్ గా  అక్రిడిటేషన్ కార్డు ఉంది . 

రాష్ట్రపతి తో సమావేశం అనగానే 'వస్తా 'అని చెప్పాను . ఇద్దరం ఆరోజు సాయంత్రం హైదరాబాద్ లోని రాజ్ భవన్ కు వెళ్ళాము .

రాష్ట్రపతి అందరి దగ్గరకు వెళ్ళినప్పుడు వారు పరిచయం చేసుకుంటున్నారు .

మా దగ్గరకు వచ్చినప్పుడు మేము పరిచయం చేసుకున్నాక , ఉడయవర్లు గారు తనతో తీసుకొచ్చిన ఆంధ్ర జ్యోతి దిన పత్రిక ఇచ్చి , అందులో చివరి పేజీ చూపించారు . అందులో రాష్ట్రపతి జైలు సింగ్ హైదరాబాద్ బేగం పెట్ ఎయిర్ పోర్ట్ లో దిగినప్పటి 

కలర్ ఫోటో ప్రచురించారు . అది చూసి  రాష్ట్రపతి ఆశ్చర్యపడి ' నా ఫోటో కలర్ లో వచ్చిందే ' అన్నారు .

అప్పుడు  ఆయన ముఖం సంతోషం తో కనిపించింది .

మీరు చూస్తున్న ఆ ఫోటో 39 సంవత్సరాలనాటిది .