ఉత్తమ జర్నలిస్టుగా తొలి అవార్డు
నేను ఆంధ్ర జ్యోతి సంస్థ నుంచి వెలువడే జ్యోతి చిత్ర సినిమా వార పత్రికలో పనిచేస్తున్నప్పుడు చాలామంది సాంస్కృతిక సంస్థల వారితో పరిచయం ఉండేది .
హైద్రాబాద్లో సినీ గోయర్స్ అసోసియేషన్ సంస్థకు మంచి పేరుంది .
ఈ సంస్థ కార్యదర్శి బి.కిషన్ అంటే సినిమా రంగంలో తెలియని వారు వుండరు . శోభన్ బాబు గారికి కిషన్ అంటే ఎంతో అభిమానం .
అలాగే నాగేశ్వర రావు , రామారావు గారితో మంచి పరిచయాలు ఉండేవి .
అప్పుడప్పుడు సినిమా జర్నలిస్టులను ఆహ్వానించి ఫతే మైదాన్ క్లబ్ లో పార్టీలు ఇచ్చేవాడు .
ఫతే మైదాన్ క్లబ్ లో చికెన్ , మటన్ బిర్యానీ అంటే చాలా మందికి ఇష్టం . అందుకే కిషన్ పిలవగానే ఏడు గంటలకు ఆ క్లబ్ కు వెళ్ళేవాళ్ళం . అలా కిషన్ ఆత్మీయుడయ్యారు .
సినీ గోయర్స్ సంస్థకు అధ్యక్షుడు జి .ఎస్. వరదాచారి గారు. ఫిలిం క్రిటిక్స్ అస్సోసియేన్ కు వరదాచారి గారు అధ్యక్షుడుగా , నేను కార్యదర్శిగా మూడు పర్యాయాలు పనిచేశాము . నా గురించి వరదాచారి గారికి బాగా తెలుసు .
ఈ సంస్థ సినిమాకు సంబంధించిన కార్యక్రమాలు నిర్వహిస్తూ ఉండేది. ముఖ్యంగా సినిమా అవార్డులను ప్రదానం చేసేవారు .
ఒకరోజు కిషన్ ఫోన్ చేసి " భగీరథ భాయ్ ఈ సంవత్సరం ఉత్తమ జర్నలిస్టుగా నిన్ను కమిటీ ఎంపిక చేసింది " అని చెప్పాడు .
ఆ మాట విని నేను ఆశ్చర్యపోయాను . "నన్నా " అన్నాను .
"అవును నిన్నే ... వరదాచారి సర్ చెప్పమన్నాడు " అన్నాడు .
"థాంక్ యు కిషన్ భాయ్ " అని చెప్పాను.
1992 సంవత్సరం సినిమా అవార్డుల్లో ఉత్తమ జర్నలిస్టుగా నేను ఎంపికయ్యాను . ఇది నాకు తొలి అవార్డు .
ఆ సంవత్సరం సినిమా అవార్డుల కార్యక్రమం తెలుగు లలిత కళాతోరణంలో జరిగింది .
ఈ కార్యక్రమానికి అప్పటి కర్ణాటక ముఖ్యమంత్రి ఎస్ . బంగారప్ప ముఖ్య అతిథిగా హాజరై సినిమా అవార్డులను ప్రదానం చేశారు .
అప్పటి ముఖ్య మంత్రి బంగారప్ప గారి నుంచి నేను అవార్డు స్వీకరించాను .
మీరు చూస్తున్నది అప్పటి ఫోటోనే .
34 సంవత్సరాలనాటి స్మృతి .

కామెంట్లు
కామెంట్ను పోస్ట్ చేయండి